الفترة وتأثيرها على الفطرة..

لما تمسك طفل عنده شهر..
احساس حلو انك تكون مسيطر عليه كدة وبتديله احساس الأمان والاطمئنان, بس بيصعب عليك بنظراته التايهة الي هو نفسه مش فاهمها..
مش فاهم هو فين وجه هنا ليه ومين دول الى ماسكينه حتى الألوان مش بتكون واضحة بالنسباله بيخرج من مكان أوسع ما في الحياة بالنسباله وبيروح لمكان ضيق أوى مش فاهمة ولا الي حواليه حتى فاهمينه
مش بيمشي الا باحساسه بس, حاسس بالانتماء لاوضته عشان التهوية جياله من اتجاه معين واخد عليه..
بيحب مامته عشان هي الي بتأكله وبتشبع كل احتياجاته البسيطة وقتها..
بيضحكلك عشان عارف انك بتحبه بيكشر وبيعيط لو حاسس انك مش بتحبه او خايف منه..
نقاءهم وصفاءهم بيحسسوك قد ايه انت شخصية ملوثة من جواك, نيتك مادية كل الي همها حاجات تشوفها وتمسكها عشان تصدقها وتقتنع بيها
وحتى لو مسكتها مش بتصدق!
من أكبر مشاكلنا لما بنكبر اننا بننسى احساسنا وبنشغل عقولنا
الادراك حلو بس لو نوظفه صح..
انا عندى امشي ببصيرتي ولا امشى ببصري
امشى باحساسي ولا امشى بحساسيتي
امشى بفكري ولا امشى بتفكيري
امشى بصبري ولا امشى بتصبيري
اروح للنور عشان شايفاه نور.. مش عشان انا بخاف م الضلمة
عايزة أعيش طفلة ماشية بفطرتي, من غير أى مؤثرات عقلية..
وعايزة امشى العالم كله زيي في اللاوعي..
بس للأسف كلنا كبار وبدل ما بنمشي بفطرتنا بنمشي بالي الفترة الي عايشنها بتحكمنا بيه

*درافت, كتبتها من سنة..

انت كويس؟!

فعلاً مش مهم غيرك يتعامل معاك ازاي.. المهم عندك لازم يكون هل انت فضلت كويس للآخر ولا لأ :)
أي حاجة تانية بقا المفروض انك تكون محصن ضدها من كتر ما عدت عليك ف مواقف مختلفة
ومش مشكلة غيرك خالص انك اتوجعت ولا اتصدمت ولا كرامتك اتجرحت, عشان ببساطة لو كانت مشكلته ماكنش هيكون هو السبب فيها م الأول :)
وهتفضل مشاكلك هي مشاكلك لوحدك.. لوحدك وبس وماينفعش تستنى من حد انه يهونها عليك ويقف جنبك ويسندك لما تحتاجه
عشان ماحدش بيفضل لحد.. سواء بمزاجه أو غصب عنه
لكن مع الوقت جلدك لذاتك ولومك بيتغير بالنقصان او الزيادة انت وحظك ونظرتك للموقف بقا
نظرتك لنفسك بترقى من كتر مانت بتشوف الي حواليك بيتغيروا وبيتحولوا.. وان من كتر ما كنت بتدورلهم على أعذار الأعذار خلصت
او بتستحقر نفسك انك بتتعامل بحسن نية او باحكام كويسة مسبقة وبتتخزوق بمزاجك فالآخر عشان كل حاجة كانت واضحة وكنت بتعديها..
بتستحقرك عشان سبت نفسك تخرج من قوقعتها تاني عشان تتجرح وتدخل تلوم عليك انك انت السبب
ومع الوقت برده ممكن تفهم ان كل ده غصب عنهم بس مشكلتهم زي مشكلتك انهم بيحملوا نفسهم وبيحملوك فوق طاقتكوا..
وماتبقاش عارف انت لازم لومك لنفسك يقل ولا يزيد.. وهل ده فعلاً هيغير من الوضع ف حاجة ولا لأ؟!
المهم اني عرفت ان انا كويسة واستاهل مني معاملة أحن على نفسي من كدة بكتيييير.. المشكلة مش فيا
المشكلة عمرها ما كانت فيا..

متلازمة الـ Overthinking

"إسراء, انتي هتموتي باوفردوز تفكير"..

امبارح قضيت اكتر من اربعة وعشرين ساعة ف السرير..
فقدت فيهم القدرة على تحديد الساعة وانا فين ف الزمن دلوقت..
فقدت القدرة على التفرقة بين الحلم والحقيقة من كتر الهلاوس الي جتلي من كتر ما دماغي كانت رافضة تفصل..
فقدت القدرة على تحديد انا اصلا حاسة بايه من كتر ما سبت كل الي جوايا يطلع..
انا مين وبعمل ايه ولمين وعشان ايه؟!
خطط حياتي هتمشي ازاي وهقدر فعلا احط الخطة دي قبل نهاية السنة زي مانا مقررة ولا لأ؟!
عدي قدامي كل أسامي الناس المهمة الي ف حياتي وموقفي فحياتهم ايه ومواقفي ف حياتاتهم ايه
أسامي الي ماتوا بس الي عايشين فينا..
أسامي الي عاشوا ميتين..
أسامي الي انتحروا..
السقف ف الضلمة شكله حلو أوي، عشان ماكنش واضح
ودي كانت اول مرة احب حاجة مش واضحة
يمكن عشان السقف موجود دايماً ولو نورت النور بمزاجي كان هيوضح
او يمكن عشان هو مجرد سقف مش هتفرق اصلا وضوحه من عدمه أو عشان كل الأسقف واحد باختلاف ألوانها؟!
مش فارقة، المهم اني فصلت عن كل حاجة حتى الأكل والشرب والكلام الكام ساعة دول..
كل حاجة خرجت من جوايا كل حاجة لدرجة الفصلان والهلاوس.. الا دماغي!

ومابقاش فاضل الا سؤال واحد, هي متلازمة الـ Overthinking دي هتحل عن سمايا امتى؟!