تحوير؟!.. ممكن

الحياة بالنسبالي بقت أقصر وأبسط بكتييييير من أني أكون فعل مع أي حد بيحور.. مانا ابقا رد فعل أسهل وأكثر تسلية
يعني اسكت واتقل واشتري من الي بيحور عليك..
اشتري أوي, اشتري خالص, اشتري جداً
ها جاب آخره ولا لسة؟!.. لسة؟!
اشتري تاني.. اشتري تالت وعاشر لحد ما يجيب آخره خالص وتستوي
ومايلاقيش حاجة يقولها ولا يعملها ويبدأ يخبط فنفسه ويناقضها
عشان لما تدي رد فعل مايجيش يوم وتندم فيه عليه ابداً وماتكونش مستني منه أي جديد
أصل الي بيحور ده مهما عمل بيرجع لنفس النقطة تاني ويلف عليها ف هيجيب آخره بسرعة ماحدش يتخيلها
انت بس القط خيط انه بيحور كده وامشي وراه واعمل عبيط وهات شوية لب واتفرج.. هتنبهر :)

كتاكيت..

عارف الكتاكيت؟ كائنات ضعيفة مش كده؟!
من تأملي فيهم الكام يوم الي فاتوا لقيت ان لما بيموت منهم واحد بيقعدوا يهللوا ويصوصوا لحد ما روحه تروح منه خالص..
وأول ما يقع ويبطل فرفرة ومعافرة، تلاقي الباقيين حضنوا بعض واتلموا ف مكان بعيد جداً عنه على قد ما يقدروا ومايعملوش اي صوت ولا حركة لحد ما اخده من وسطيهم وارميه
قوم الاقيهم عملوا ايه؟
اول ما شلته من جنبهم لقيتهم هجموا ع الاكل وفرفشوا وكل واحد منهم عمل الي مايتعملش وكان الموقف ماحصلش اصلا..
نتعلم ايه بقا منهم؟
اولاً، لما حد يتعرض لأذى قدامك، لو مش بتعرف تساعده علّي صوتك يمكن غيرك يسمعك ويساعده
ثانياً، الكتكوت احترم هيبة الموت وسكت شوية.. حضن الي حواليه وحزن شوية وادا الموقف حقه واتنقل لثالثاً الي هي تجاوز الموقف وان حياته ماوقفتش..
انا عارفة ان حياتنا معقدة اكتر من حياة الكتاكيت بمراحل
وماتكلمتش مع كتاكيت قبل كده عشان أعرف بيحسوا بايه، بس كل الي اعرفه انهم أرواح زينا زيهم
واعتقد ان الي كل الكائنات بتعمله من أجل البقاء ممكن جداً يتطبق علينا كبشر..
ربنا يجعل تجاوزكوا واحترامكوا لوجع غيركوا زي الكتاكيت