- - إسراء.. انا عايزة اسأل عن فلان
+ اسألي
- إسراء.. انا قرفانة من فلان
+ بطلي تكلميه
- إسراء.. فلان واحشني
+ كلميه
- خايفة من رد الفعل, مش عايزة اتأذي
+ وفيها ايه؟ هيجرالك على إيده أكتر من الي جرالك قبل كده؟!
- لأ.
+ خلاص اسألي عادي وحطي كل الاحتمالات.. وماتزعليش
-------------
ده ملخص حوارات حصلت بيني وبين بنات كتير الفترة الي فاتت -عشان كده الصيغة بناتي-
رأيي ان الحياة أبسط من اننا نحسب كل حاجة بالورقة والقلم
لو حصل فراق بين وبينك أي شخص اياً كانت علاقتكوا دي كانت ايه او كانت أسباب الفراق ده ايه.. بسط الأمر
حد واحشك اسأل عليه, صدك؟! مش مهم
انت بتسأل عشان عايز تسأل وتطمن.. هو بقا قدّر ده او ماقدرهوش مش مشكلتك
واديك عرفت راسك من رجليك وانك لما تيجي تكررها تاني هتكون وازن بين كرامتك وبين قلقك عليه وهيكون القرار أسهل من المرة الي فاتت
حد مش طايقه بسبب تصرفات تضايقك.. ماتكلمهوش وتجنبه
جه عاتبك؟! يبقا انت محتاج تراجع نفسك ف انك مش طايق حد باقي عليك
ماجاش؟! يبقا كان بيخرجك من حياته وانت عملت ده وتصرفك كان صح
حد واحشك؟! ارفع سماعة التليفون وكلمه
الحياة فيها ما يكفي من العقد, والنظام الاجتماعي اتعمل لتسهيل الحياة
لو ناويين تعقدوها على نفسكوا يبقا بلاش تعرفوا ناس من الأول
وخد الحياة زي ماهي كده.. واعرف ان مافيش وردة مافيهاش شوكة, بالعكس هي بقت وردة بسبب الشوكة دي
مركب ورق قلبي, أوان فرحها ماجاش :)
No comments:
Post a Comment